_____
احتمالات التفرد فى القصيدة
تبتدى
لحظة خروجك وردة
من بين السطور
انا وانتِ والحلم الشقي
ومرح الطيور
والشوق ما بيننا
جزيرة خضرة
بعيدة عن كل البشر
تفتكرى ممكن يحصل ايه؟؟
..............
..........
ما تكمليش
ما تفكريش غير ف اللى جىّ
هابعت احاسيس البنفسج
تحضنك
واخفض جناح العشق
لعنيكى الربيع
واهاديكى بالرطب الجنينة كلها
ونهز جذع الفرحة
بخيالنا الوسيع
والشوق سنابل وردى
يرميها القمر
برد وسلام ف قلوبنا
ونضارة النعيم
تفتكرى ممكن يحصل ايه؟؟
....................
ما تكمليش
ما تكمليش
