جت على بالى فى المعتكف فكتبتها بسرعة من غير مراجعة
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
أنا عايز أموتقالوا عن الشباب المصري سيس
بعد ما شالوا الريس مقضينها تهييس
شوية عيال مالهومش لازمة و دمهم رخيص
بنديهم على أفاهم من زمان .. و مقتنعين إن ده اسمه peace
اللي كان ع الجبهة راجل
و اللي مات في الحرب راجل
و اللي واقف تحت السفارة راجل
و الميدان يشهد على ألف راجل و راجل
كل الكلام ده هباء و دول من الأصل باطل
يمكن يا ناس كنا يوم طيبين
و رضينا ب الهم على قلوبنا و مسلميين
لكن لما تيجي لحد دمنا ممكن نبقى مجرمين
و لو إني مجرم عشان بلادي .. يبقى شرف و عليين
و احنا بنعشق دم اليهود .. و دم ولادنا عشق الطين
لما أعيش مذلول في بلدي و راضي بحكم مستعمرين
يبقى أهون أموت شهيد على أرض بلدي و يشرب دمي الطين
إسرائيل بتلاعبنا من تحت لتحت
فاكرين مصر مجرد اسم أو نقش و نحت
ما هي لوكانت كده كنت أنا نفسي نمت و ارتحت
مصر روح بتحرك ولادها بكلمة بلادي
مصر دم بيجري في عرقونا زي نهر في وادي
مصر قلب يدق لما نسمع نشيد بلادي
مصر اللي قولنا عشانها .. لكي حبي و فؤادي
مصر اللي قالت في يوم .. اللي ماتوا دول ولادي
مش مجرد أغاني و مش مجرد كلام و عادي
و أنا كرمتي زي بلدي مش بالصوت
عايز رد كرامتي و ابن بلدي اللي شاف الموت
ما هو يا أعيش بكرامتي يا إما تجيبولي تابوت
و لو بلادي من غير كرامة ...
يبقى أهون عليا أموت
_____________________________________________
أيمنْ سيفْ
